ປະຫວັດຄວາມເປັນມາ

ການພັດທະນາການສຶກສາ ແມ່ນຄວາມຈຳເປັນ ແລະ ເປັນປັດໄຈເບື້ອງຕົ້ນທີ່ສຳຄັນທີ່ສຸດສຳລັບການພັດທະນາປະເທດຊາດ, ປະເທດໃດມີຊັບພະຍາກອນມະນຸດທີ່ມີການສຶກສາສູງ ປະເທດນັ້ນກໍຈະໄດ້ຮັບການພັດທະນາໄວ ແລະ ມີຄວາມຈະເລີນກ້າວໜ້າ ເພາະວ່າ ການສຶກສາມີບົດບາດສຳຄັນເປັນຢ່າງຍິ່ງຕໍ່ກັບການພັດທະນາເສດຖະກິດສັງຄົມ, ເຊິ່ງບົດບາດ ແລະ ຄວາມສຳຄັນດັ່ງກ່າວນີ້ ສາມາດພິສູດໃຫ້ເຫັນໄດ້ຈາກ ໃນໄລຍະທີ່ຜ່ານມາ ພຶດຕິກຳກໍຄືບົດຮຽນຕົວຈິງຂອງຫຼາຍໆປະເທດທີ່ຈະເລີນສິວິໄລຢູ່ໃນໂລກ ກ່ອນທີ່ປະເທດເຫຼົ່ານັ້ນໄດ້ຫຼຸດພົ້ນອອກຈາກຄວາມທຸກຍາກ ແລະ ກາຍເປັນປະເທດທີ່ຈະເລີນເຂັ້ມແຂງນັ້ນ ແນ່ນອນກໍມີຫຼາຍວິທີການ ມີຫຼາຍມາດຕະການ ແລະ ມີທຶນຮອນຫຼາຍໜ້ອຍແຕກຕ່າງກັນ ແຕ່ເຖິງຢ່າງໃດກໍຕາມ ປັດໄຈອັນສຳຄັນຕັດສິນກວ່າໝູ່ກໍແມ່ນຄົນ ເຊິ່ງເປັນຄົນທີ່ມີການສຶກສາສູງ, ມີຄວາມຮູ້ມີຄວາມສາມາດ.

ຍ້ອນເຫັນໄດ້ຄວາມສຳຄັນດັ່ງກ່າວ ພັກ ແລະ ລັດຖະບານລາວ ຈຶ່ງໄດ້ເອົາໃຈໃສ່ວຽກງານການສຶກສາ ຖືເອົາການສຶກສາເປັນວຽກງານໃຈກາງໃນການກໍ່ສ້າງຊັບພະຍາກອນມະນຸດ ໂດຍວາງນະໂຍບາຍສົ່ງເສີມໃຫ້ທັງພາກລັດ ແລະ ພາກເອກະຊົນລົງທຶນໃສ່ວຽກງານການສຶກສາ ເພື່ອສ້າງເງື່ອນໄຂສະດວກໃຫ້ແກ່ນັກຮຽນພາຍຫຼັງຮຽນຈົບສາມັນສຶກສາແລ້ວ ມີໂອກາດໄດ້ຮໍ່າຮຽນໃນລະດັບວິຊາຊີບ ຫຼື ລະດັບມະຫາວິທະຍາໄລຫຼາຍຂຶ້ນ. ພ້ອມກັນນັ້ນ, ກໍໄດ້ຊຸກຍູ້ສົ່ງເສີມໃຫ້ພະນັກງານລັດຖະກອນ ໄດ້ຍົກລະດັບຄວາມຮູ້ວິຊາສະເພາະໃຫ້ສູງຂຶ້ນເລື້ອຍໆ. ເຖິງຢ່າງໃດກໍຕາມ, ເນື່ອງຈາກວ່າ ລັດຖະບານມີທຶນຮອນຈຳກັດ ບໍ່ສາມາດຕອບສະໜອງໂຄຕ້າທຶນການສຶກສາໃຫ້ແກ່ນັກຮຽນນັກສຶກສາໄດ້ຢ່າງທົ່ວເຖິງ ແລະ ພຽງພໍກັບຄວາມຮຽກຮ້ອງຕ້ອງການຂອງຜູ້ຮຽນທັງໝົດ ແລະ ຍັງມີປະຊາຊົນຈໍານວນຫຼວງຫຼາຍທີ່ມີລາຍຮັບທາງເສດຖະກິດບໍ່ພຽງພໍ ເພື່ອສົ່ງເສີມໃຫ້ລູກຫຼານໄດ້ຮັບການສຶກສາທີ່ດີ. ສະນັ້ນ, ໃນແຕ່ລະປີ ຈຶ່ງມີນັກຮຽນທີ່ຮຽນຈົບສາມັນສຶກສາ ຈໍານວນບໍ່ໜ້ອຍທີ່ມີຄວາມມຸ່ງຫວັງຕ້ອງການຢາກເຂົ້າຮຽນໃນລະດັບວິຊາຊີບ ຫຼື ລະດັບມະຫາວິທະຍາໄລ ແຕ່ພວກເຂົາເຫຼົ່ານັ້ນພັດບໍ່ມີໂອກາດໄດ້ຮໍ່າຮຽນ, ມີຫຼາຍຄົນຮຽນເກັ່ງເສັງເຂົ້າຮຽນວິຊາຊີບ ຫຼື ມະຫາວິທະຍາໄລໄດ້ ແຕ່ບໍ່ມີທຶນຮອນໄປຮຽນ ຍ້ອນເສດຖະກິດຄອບຄົວຫຍຸ້ງຍາກ.

ເພື່ອເປັນການສ້າງໂອກາດເພີ່ມເຕີມໃຫ້ແກ່ນັກຮຽນນັກສຶກສາທີ່ຕ້ອງການຢາກສຶກສາຮໍ່າຮຽນ, ອີກດ້ານໜຶ່ງກໍເພື່ອເປັນການສົ່ງເສີມໃຫ້ຄົນລາວໄດ້ໄປຮໍ່າຮຽນເອົາບົດຮຽນ, ຄວາມຮູ້ວິທະຍາສາດເທັກໂນໂລຢີຈາກປະເທດທີ່ຈະເລີນກ້າວໜ້າ ກັບຄືນມາສ້າງສາປະເທດຊາດຂອງຕົນ ພັກລັດຈຶ່ງໄດ້ຮ່ວມມືກັບສາກົນ ໂດຍສະເພາະແມ່ນເພື່ອນມິດປະເທດໃກ້ຄຽງ ຍາດແຍ່ງເອົາທຶນການສຶກສາ ມາໃຫ້ນັກຮຽນນັກສຶກສາລາວໄປຮໍ່າຮຽນຢູ່ຕ່າງປະເທດນັບມື້ນັບຫຼາຍຂຶ້ນ. ແຕ່ເຖິງຢ່າງນັ້ນກໍຕາມ, ຍັງບໍ່ສາມາດຕອບສະໜອງຕາມຄວາມຮຽກຮ້ອງຕ້ອງການຂອງຜູ້ຢາກຮຽນໄດ້ຢ່າງທົ່ວເຖິງ ເນື່ອງຈາກວ່າ ທຶນການສຶກສາທີ່ກະຊວງສຶກສາທິການ ແລະ ກິລາ ໄດ້ຮັບຈາກຕ່າງປະເທດໃນແຕ່ລະປີ ມີຈຳນວນຈໍາກັດ ບໍ່ພຽງພໍກັບຄວາມຕ້ອງການຂອງຜູ້ຢາກໄປຮຽນ ເຮັດໃຫ້ນັກຮຽນນັກສຶກສາກໍຄືພະນັກງານລັດຖະກອນ ທີ່ຕ້ອງການຢາກຍົກລະດັບຄວາມຮູ້ວິຊາສະເພາະຈໍານວນຫຼວງຫຼາຍ ຍັງບໍ່ມີໂອກາດໄດ້ໄປສຶກສາຮໍ່າຮຽນຕາມຄວາມມຸ່ງຫວັງຂອງເຂົາເຈົ້າ. ແຕ່ຄວາມຈິງ ໃນປັດຈຸບັນ ນອກຈາກທຶນການສຶກສາທີ່ກະຊວງສຶກສາທິການ ແລະ ກິລາໄດ້ຮັບຈາກຕ່າງປະເທດໃນແຕ່ລະປີແລ້ວ ຍັງມີຫລາຍປະເທດ, ຫຼາຍສະຖາບັນການສຶກສາໃຫ້ທຶນການສຶກສາແກ່ນັກຮຽນນັກສຶກສາລາວ ໂດຍເປີດກວ້າງໃຫ້ນັກຮຽນນັກສຶກສາ ສາມາດຍື່ນສະໝັກໄດ້ດ້ວຍຕົນເອງ ໂດຍຜ່ານຊ່ອງທາງຕ່າງໆ ແຕ່ຜູ້ທີ່ຕ້ອງການຢາກໄປຮໍ່າຮຽນຈໍານວນຫຼວງຫຼາຍ ຍັງບໍ່ສາມາດເຂົ້າເຖິງຂໍ້ມູນຂ່າວສານເຫຼົ່ານັ້ນໄດ້ ດ້ວຍຫຼາຍປັດໄຈ ເຊິ່ງປັດໄຈຫຼັກແມ່ນຍ້ອນບໍ່ມີອົງກອນ, ໜ່ວຍງານ ຫຼື ວິສາຫະກິດ ທີ່ບໍລິການຈັດຫາທຶນການສຶກສາທີ່ເປີດກວ້າງຈາກບັນດາປະເທດຕ່າງໆ ມາເຜີຍແພ່, ໃຫ້ຄຳປຶກສາ, ຊ່ວຍດໍາເນີນເອກະສານ ແລະ ຊ່ວຍປະສານງານໃນການສະໝັກທຶນການສຶກສາໃຫ້ແກ່ຮັກຮຽນນັກສຶກສາ ຄືດັ່ງທີ່ມີຢູ່ໃນຫຼາຍປະເທດເຊັ່ນ: ລາຊາອານາຈັກໄທ, ສປຈີນ, ສສ ຫວຽດນາມ, ສິງກະໂປ ແລະ ອື່ນໆ ເຊິ່ງມີຫຼາຍບໍລິສັດທີ່ເຄື່ອນໄຫວວຽກງານໃຫ້ຄຳປຶກສາ ແລະ ບໍລິການດ້ານການໄປສຶກສາຢູ່ຕ່າງປະເທດ. 

ເພື່ອປະກອບສ່ວນພາລະກິດໃນການກໍ່ສ້າງຊັບພະຍາກອນມະນຸດຂອງລັດ ກໍຄືຕອບສະໜອງຕໍ່ຄວາມຮຽກຮ້ອງຕ້ອງການຂອງ ນັກຮຽນນັກສຶກສາ ທີ່ຢາກໄປສຶກສາຮໍ່າຮຽນຢູ່ຕ່າງປະເທດນັບມື້ນັບຫຼາຍຂຶ້ນຄືດັ່ງທີ່ໄດ້ກ່າວມາຂ້າງເທິງນັ້ນ ບໍລິສັດ ເມຕາ ການສຶກສາຈຳກັດຜູ້ດຽວ ຈຶ່ງໄດ້ຮັບການສ້າງຕັ້ງຂຶ້ນ ໃນວັນທີ 18 ມັງກອນ 2023 ເຊິ່ງເປັນການຍົກລະດັບຂຶ້ນເປັນບໍລິສັດຈຳກັດຈາກ ວິສາຫະກິດສ່ວນບຸກຄົນ ທີ່ໄດ້ສ້າງຕັ້ງຂຶ້ນໃນປີ 2017 ໂດຍເຄື່ອນໄຫວທຸລະກິດໃນດ້ານການຈັດຫາທຶນການສຶກສາທີ່ເປີດກວ້າງຈາກປະເທດຕ່າງໆມາເຜີຍແຜ່, ໃຫ້ຄໍາປຶກສາ, ຊ່ວຍດໍາເນີນເອກະສານ ແລະ ຊ່ວຍປະສານງານໃນການສະໝັກທຶນໃຫ້ແກ່ນັກຮຽນນັກສຶກສາ ກໍຄືພະນັກງານລັດຖະກອນທີ່ຕ້ອງການຢາກໄປຍົກລະດັບຄວາມຮູ້ວິຊາສະເພາະຈາກຂອບເຂດທົ່ວປະເທດ. 

ການພັດທະນາດ້ານການສຶກສາໃນ ສປປລາວ

        ກົດໝາຍວ່າດ້ວຍການສຶກສາຂອງ ສປປລາວ ເລກທີ 133/ປປທ, ສະບັບປັບປຸງ ວັນທີ 28 ສິງຫາ 2015, ໄດ້ກຳນົດເອົາການສຶກສາເປັນວຽກງານໃຈກາງຂອງການພັດທະນາຊັບພະຍາກອນມະນຸດ, ລັດຖືສຳຄັນການພັດທະນາຄົນທາງດ້ານຄຸນສົມບັດສິນທຳປະຕິວັດ, ຊີວະທັດ, ໂລກະທັດ ແລະ ວິທະຍາສາດເຕັກໂນໂລຢີ ຄືສ້າງຄົນໃຫ້ມີຄວາມຮູ້ຄວາມສາມາດ ແລະ ຮູ້ຄົ້ນຄິດປະດິດສ້າງ, ລັດ ແລະ ທົ່ວສັງຄົມລາວ ຕ້ອງຕັ້ງໜ້າພັດທະນາການສຶກສາແຫ່ງຊາດໃຫ້ມີຄຸນນະພາບ, ສ້າງໂອກາດໃຫ້ປະຊາຊົນລາວໄດ້ຮັບການສຶກສາຮໍ່າຮຽນຢ່າງທົ່ວເຖິງ, ສ້າງເງື່ອນໄຂ ແລະ ຊຸກຍູ້ໃຫ້ພົນລະເມືອງລາວໄດ້ຮໍ່າຮຽນວິຊາຊີບ ແລະ ການສຶກສາຊັ້ນສູງຫຼາຍຂຶ້ນ. ລັດສົ່ງເສີມ ແລະ ຊຸກຍູ້ໃຫ້ບຸກຄົນ, ການຈັດຕັ້ງ ລວມທັງເອກະຊົນພາຍໃນ ແລະ ຕ່າງປະເທດລົງທຶນເຂົ້າໃນການພັດທະນາການສຶກສາແຫ່ງຊາດ ດ້ວຍນະໂຍບາຍຕ່າງໆເຊັ່ນ: ນະໂຍບາຍສິນເຊື່ອ, ຍົກເວັ້ນ ຫຼື ຫຼຸດຜ່ອນພາສີອາກອນ, ສ້າງທຸກເງື່ອນໄຂທີ່ອຳນວຍຄວາມສະດວກໃຫ້ແກ່ວຽກງານການພັດທະນາການສຶກສາ.

         ປັດຈຸບັນ, ວຽກງານການສຶກສາຂອງ ສປປລາວ ໄດ້ຮັບການປະກອບສ່ວນຈາກທົ່ວສັງຄົມທັງພາກລັດ ແລະ ພາກເອກະຊົນ ລວມທັງຕ່າງປະເທດ, ການລົງທຶນໃສ່ວຽກງານການສຶກສາໄດ້ເພີ່ມຂຶ້ນຢ່າງຕໍ່ເນື່ອງ, ສະຖານການສຶກສາ, ສິ່ງອຳນວຍຄວາມສະດວກ ແລະ ຫຼັກສູດການຮຽນການສອນໄດ້ຮັບການປັບປຸງ ແລະ ສ້າງຂຶ້ນໃໝ່ເປັນກ້າວໆ ເຮັດໃຫ້ການສຶກສາຂອງ ສປປລາວ ໄດ້ຮັບການຂະຫຍາຍຕົວທັງທາງດ້ານປະລິມານ ແລະ ຄຸນນະພາບ, ປະຊາຊົນລາວໄດ້ຮັບການສຶກສາໃນລະດັບອະຊີວະສຶກສາ ແລະ ການສຶກສາຊັ້ນສູງນັບມື້ນັບເພີ່ມຂຶ້ນ, ໃນສົກຮຽນ 2016-2017 ຈຳນວນນັກຮຽນທີ່ຈົບມັດທະຍົມຕອນປາຍທົ່ວປະເທດມີ 62,767 ຄົນ, ໄດ້ເຂົ້າຮຽນຕໍ່ໃນລະດັບຊັ້ນກາງ, ຊັ້ນສູງ ແລະ ປະລິນຍາຕີພາຍໃນປະເທດລວມທັງໝົດ 32,700 ຄົນ, ໄປຮຽນຕໍ່ຢູ່ຕ່າງປະເທດບໍ່ຕໍ່າກວ່າ 3,000 ຄົນ, ໃນຂະນະດຽວກັນ ຜູ້ທີ່ສຳເລັດການສຶກສາຈາກໂຮງຮຽນວິຊາຊີບ ແລະ ມະຫາວິທະຍາໄລ ສາມາດຊອກວຽກເຮັດງານທຳໄດ້ເຖິງ 75%.

          ແຜນສຸດທະສາດການພັດທະນາການສຶກສາແຫ່ງຊາດຮອດປີ 2025 ແລະ 2030 ໄດ້ກໍານົດແນວທາງການພັດທະນາວຽກງານການສຶກສາ ໂດຍລັດຈະລົງທຶນເພີ່ມໃສ່ວຽກງານການສຶກສາ ພ້ອມກັນນັ້ນ ກໍໄດ້ຊຸກຍູ້ສົ່ງເສີມໃຫ້ພາກເອກະຊົນທັງພາຍໃນ ແລະ ຕ່າງປະເທດລົງທຶນໃນດ້ານການສຶກສາ ເພື່ອຂະຫຍາຍໂອກາດເຂົ້າຮຽນ, ພັດທະນາຄຸນນະພາບການສຶກສາໃຫ້ທຽບເທົ່າກັບພາກພື້ນ, ກໍ່ສ້າງຊັບພະຍາກອນມະນຸດທີ່ມີຄວາມຮູ້ຄວາມສາມາດ, ມີສີມືແຮງງານ, ກໍ່ສ້າງນັກວິຊາການ, ນັກຄົ້ນຄວ້າ ເພື່ອຕອບສະໜອງຄວາມຮຽກຮ້ອງຕ້ອງການຂອງພາລະກິດປົກປັກຮັກສາ ແລະ ສ້າງສາປະເທດຊາດ.

          ໃນປັດຈຸບັນນີ້ ການພັດທະນາເສດຖະກິດຂອງ ສປປລາວ ໄດ້ຂະຫຍາຍຕົວຢ່າງຕໍ່ເນື່ອງ, ມີການລົງທຶນຈາກທັງພາຍໃນ ແລະ ຕ່າງປະເທດນັບມື້ນັບເພີ່ມຂຶ້ນ, ອຸດສາຫະກຳໃນດ້ານຕ່າງໆເຊັ່ນ: ການທ່ອງທ່ຽວ, ການຜະລິດສິນຄ້າ, ໄຟຟ້າ, ຄົມມະນາຄົມ, ກະສິກຳ, ການແພດ ແລະ ອື່ນໆ ໄດ້ຮັບການຂະຫຍາຍຕົວໄວພໍສົມຄວນ ເຊິ່ງການຂະຫຍາຍຕົວຂອງອຸດສາຫະກຳດ້ານຕ່າງໆຄືດັ່ງກ່າວ ເຮັດໃຫ້ມີຄວາມຕ້ອງການບຸກຄະລາກອນທີ່ມີການສຶກສາ, ມີຄວາມຮູ້ຄວາມສາມາດ, ມີຄວາມຊໍານານງານ, ມີສີມືແຮງງານນັບມື້ນັບຫຼາຍຂຶ້ນ ເພື່ອແຂ່ງຂັນກັບພາກພື້ນ ແລະ ສາກົນ. ແຕ່ໃນປັດຈຸບັນ ສປປລາວ ຍັງບໍ່ສາມາດຕອບສະໜອງບຸກຄະລາກອນທີ່ມີຄວາມຮູ້ຄວາມສາມາດໃຫ້ກັບຄວາມຮຽກຮ້ອງຕ້ອງການດັ່ງກ່າວໄດ້ຢ່າງພຽງພໍ ໂດຍສະເພາະແມ່ນໂຄງການລົງທຶນໃໝ່ ແລະ ໂຄງການໃຫຍ່ຈາກຕ່າງປະເທດເຊັ່ນ: ໂຄງການສ້າງທາງລົດໄຟ, ເຂື່ອນໄຟຟ້າ, ອຸດສາຫະກຳກົນຈັກໜັກ, ເຕັກໂນໂລຊີຂັ້ນສູງ ແລະ ອື່ນໆ ຈຶ່ງຈຳເປັນຕ້ອງໄດ້ນຳບຸກຄະລາກອນຈາກຕ່າງປະເທດເຂົ້າມາເປັນຈຳນວນຫຼວງຫຼາຍ, ຄຽງຄູ່ກັບການພັດທະນາເສດຖະກິດສັງຄົມຂະຫຍາຍຕົວຢ່າງຕໍ່ເນື່ອງ ການສຶກສາຂອງ ສປປລາວ ກໍໄດ້ຮັບການພັດທະນາເປັນກ້າວໆ ມີໂຮງຮຽນເຕັກນິກວິຊາຊີບ, ວິທະຍາໄລ ແລະ ມະຫາວິທະຍາໄລທັງພາກລັດ ແລະ ພາກເອກະຊົນໄດ້ຮັບການສ້າງຕັ້ງຂຶ້ນເປັນຈຳນວນຫຼວງຫຼາຍ ເຊິ່ງສາມາດຮອງຮັບນັກຮຽນທີ່ຮຽນຈົບມັດທະຍົມຕອນປາຍໃນແຕ່ລະປີ. ແຕ່ເຖິງຢ່າງໃດກໍຕາມ ຄຸນນະພາບການສຶກສາຂອງ ສປປລາວ ຍັງບໍ່ທັນສູງເທົ່າທີ່ຄວນເມື່ອທຽບໃສ່ພາກພື້ນ ແລະ ສາກົນ ດ້ວຍຫຼາຍສາເຫດ ແລະ ປັດໃຈ, ມີຫຼາຍສາຂາວິຊາ ແລະ ຂະແໜງການບໍ່ທັນໄດ້ເປີດສອນໃນ ສປປລາວ ເຖິງວ່າວຽກງານມີຄວາມຕ້ອງການໃນສາຂາເຫຼົ່ານີ້ກໍຕາມ ເປັນຕົ້ນແມ່ນ ດ້ານການລົດໄຟ, ອຸດສາຫະກຳຜະລິດກົນຈັກ, ການຜະລິດເຕັກໂນໂລຢີ ແລະ ອື່ນໆ ຈຶ່ງຈຳເປັນຕ້ອງໄປສຶກສາຢູ່ຕ່າງປະເທດ. ອີກດ້ານໜຶ່ງ ຍັງມີນັກຮຽນນັກສຶກສາຈຳນວນຫຼວງຫຼາຍທີ່ຕ້ອງການຢາກສຶກສາຮໍ່າຮຽນໃນລະດັບວິຊາຊີບ ແລະ ມະຫາວິທະຍາໄລ ແຕ່ບໍ່ມີທຶນຮອນພຽງພໍ ຈຶ່ງຈຳເປັນຕ້ອງໄດ້ຮ້ອນຮົນຊອກຫາທຶນການສຶກສາດ້ວຍຕົນເອງ, ມີຫຼາຍຄົນບໍ່ມີໂອກາດໄດ້ສຶກສາຮໍ່າຮຽນ ຍ້ອນບໍ່ສາມາດຊອກຫາທຶນໄດ້. ສະນັ້ນ, ເພື່ອຕອບສະໜອງຕໍ່ຄວາມຮຽກຮ້ອງຕ້ອງການຂອງຜູ້ຮຽນທີ່ນັບມື້ນັບເພີ່ມຂຶ້ນນັ້ນ ບໍລິສັດ ເມຕາ ການສຶກສາຈຳກັດຜູ້ດຽວ ຈຶ່ງໄດ້ພົວພັນກັບບັນດາສະຖາບັນການສຶກສາຂອງປະເທດຕ່າງໆເຊັ່ນ: ສສ ຫວຽດນາມ, ສປຈີນ, ໄທ, ສິງກະໂປ, ມາເລເຊຍ, ອິນໂດເນເຊຍ, ອົດສະຕະລີ ແລະ ເອີລົບ ເພື່ອຍາດແຍ່ງເອົາທຶນການສຶກສາໃນລະດັບຝືກອົບຮົມໄລຍະສັ້ນ, ລະດັບວິຊາຊີບຊັ້ນກາງ, ຊັ້ນສູງ, ປະລິນຍາຕີ, ປະລິນບາໂທ ແລະ ປະລິນຍາເອກມາເຜີຍແພ່ໃຫ້ແກ່ນັກຮຽນນັກສຶກສາ ກໍຄືພະນັກງານລັດຖະກອນທີ່ຕ້ອງການຢາກໄປຍົກລະດັບຄວາມຮູ້ວິຊາສະເພາະ ໂດຍມີພະນັກງານທີ່ມີຄວາມຮູ້ຄວາມສາມາດ ແລະ ມີຄວາມຊໍານານງານ ເຊິ່ງຮຽນຈົບຈາກຕ່າງປະເທດມາບໍລິຫານຈັດການ, ໃຫ້ການບໍລິການຢ່າງເປັນມືອາຊີບ ແລະ ມີປະສິດທິພາບ.   

ປະເພດການບໍລິການ

·      ບໍລິການສະໝັກທຶນໄປຮຽນຕໍ່ຕ່າງປະເທດ;

·      ບໍລິການແລ່ນເອກະສານນັັກສຶກສາຕ່າງປະເທດມາຮຽນຢູ່ລາວ;

·      ບໍລິການແລ່ນວີຊ້ານັກສຶກສາ, ວີຊ້າທ່ອງທ່ຽວ, ວີຊ້າທຸລະກິດ;

·      ບໍລິການແລ່ນເອກະສານແຕ່ງງານກັບຄົນຕ່າງປະເທດ;

·      ບໍລິການແປເອກະສານພາສາຕ່າງປະເທດ;

·      ບໍລິການຝຶກອົບຮົມພາສາຕ່າງປະເທດໄລຍະສັ້ນ;

·      ບໍລິການແລ່ນເອກະສານຂຶ້ນທະບຽນວິສາຫະກິດ ແລະ ໃບອະນຸຍາດດໍາເນີນທຸລະກິດ;

·      ໃຫ້ຄໍາປຶກສາໃນການສ້າງຕັ້ງວິສາຫະກິດ ຫຼື ບໍລິສັດໃໝ່;

ແນວທາງການໃຫ້ບໍລິການ ແລະ ສະຖານທີ່ຕິດຕໍ່ພົວພັນ

      ບໍລິສັດ ເມຕາ ການສຶກສາຈຳກັດຜູ້ດຽວ ຍິນດີໃຫ້ບໍລິການແກ່ ນັກຮຽນທີ່ຮຽນຈົບມັດທະຍົມຕອນປາຍໃນແຕ່ລະປີ, ພະນັກງານທັງພາກລັດ ແລະ ພາກເອກະຊົນທີ່ຕ້ອງການຢາກໄປຍົກລະດັບວິຊາສະເພາະຈາກຂອບເຂດທົ່ວປະເທດ ເຊິ່ງບໍລິສັດມີຫ້ອງການສຳນັກງານຕັ້ງຢູ່ບ້ານໂພນໂຮມ ເມືອງບຸນເໜືອ ແຂວງຜົ້ງສາລີ; ບ້ານເຈງ ເມືອງໄຊ ແຂວງອຸດົມໄຊ; ບ້ານນາສ້າງເຫວີຍ, ນະຄອນຫຼວງພະບາງ; ບ້ານຈອມມະນີ ເມືອງໄຊເສດຖາ ນະຄອນຫຼວງວຽງຈັນ. ຜູ້ທີ່ຢູ່ໃກ້ຫ້ອງການແມ່ນສາມາດເຂົ້າມາພົວພັນຢູ່ຫ້ອງການໄດ້ໂດຍກົງ, ສໍາລັບຜູ້ທີ່ຢູ່ໄກ ສາມາດຕິດຕໍ່ພົວພັນໄດ້ທາງໂທລະສັບ, ອີເມລ, ເຟສບຸກ, ວອດແອັບ ແລະ ຊ່ອງທາງອື່ນໆ. ການຮັບສົ່ງເອກະສານຕ່າງໆສາມາດຮັບສົ່ງຜ່ານຊ່ອງທາງດັ່ງກ່າວ ຫຼື ຊ່ອງທາງຄົມມະນາຄົມຂົນສົ່ງກໍໄດ້. ການສະໝັກທຶນການສຶກສາໃດໆກໍຕາມ, ຜູ້ສະໝັກຈະຕ້ອງໄດ້ສະໜອງເອກະສານທີ່ຖືກຕ້ອງ ແລະ ຈໍາເປັນເຊັ່ນ: ເອກະສານທີ່ມີກາຈໍ້າ ແລະ ລາຍເຊັນ, ຊີວະປະຫວັດສ່ວນຕົວ, ສ່ວນເອກະສານທີ່ເປັນແບບຟອມຕ່າງໆແມ່ນ ທາງບໍລິສັດສາມາດປະກອບໃຫ້ໄດ້.

      ພາຍຫຼັງໄດ້ຮັບທຶນການສຶກສາ ໂດຍມີໜັງສືແຈ້ງຕອບໃຫ້ທຶນການສຶກສາຈາກສະຖາບັນທີ່ກ່ຽວຂ້ອງແລ້ວ, ທາງບໍລິສັດຈະແລ່ນຂໍ້ຕົກລົງວ່າດ້ວຍການສົ່ງນັກສຶກສາໄປຮຽນຢູ່ຕ່າງປະເທດຈາກກະຊວງສຶກສາທິການ ແລະ ກິລາ, ກົມກິດຈະການນັກສຶກສາ ຍົກເວັ້ນພະນັກງານລັດ ເຊິ່ງຈະຕ້ອງແລ່ນດ້ວຍຕົນເອງ ໂດຍຜ່ານກົມກອງທີ່ຕົນເອງສັງກັດ. ຫຼັງຈາກນັ້ນ ຈະກໍານົດວັນເວລາເດິນທາງ ແລະ ແຈ້ງໃຫ້ຜູ້ໄດ້ຮັບທຶນຮັບຊາບກ່ອນເດິນທາງ 10 ວັນເປັນຢ່າງຊ້າ ເພື່ອກະກຽມຄວາມພ້ອມໃນການເດິນທາງ. ເພື່ອຮັບປະກັນໃຫ້ນັກສຶກສາເລີ່ມຕົ້ນໃຊ້ຊີວິດ ແລະ ຮໍ່າຮຽນຢູ່ຕ່າງປະເທດເປັນໄປດ້ວຍດີ ພ້ອມທັງປົກປັກຮັກສາວັດທະນະທໍາອັນດີງາມຂອງຊາດລາວ ບໍ່ໃຫ້ນັກສຶກສາປະພຶດຕົນອັນເປັນການສ້າງຄວາມເຊື່ອມເສຍຕໍ່ປະເທດຊາດຂອງຕົນໃນເວທີຕ່າງປະເທດ, ກ່ອນຈະເດິນທາງໄປສຶກສາຢູ່ຕ່າງປະເທດ ນັກສຶກສາທຸກຄົນຈະຕ້ອງໄດ້ຜ່ານການຝຶກອົບຮົມກ່ຽວກັບລະບຽບການຄຸ້ມຄອງນັກສຶກສາລາວໄປສຶກສາຢູ່ຕ່າງປະເທດຂອງກົມຈິດຈະການນັກສຶກສາສະບັບເລກທີ 3552/ສສກ.ກມ.13, ລົງວັນທີ 28 ສິງຫາ 2013. ພ້ອມກັນນັ້ນ ກໍຈະໄດ້ຮຽນຮູ້ຄວາມຮູ້ພື້ນຖານກ່ຽວກັບວັດທະນະທໍາ, ປະເພນີ, ການໃຊ້ຊີວິດຢູ່ຕ່າງປະເທດ ຕະຫຼອດຈົນເຖິງລະບຽບກົດໝາຍພື້ນຖານຂອງປະເທດທີ່ຈະໄປຮຽນ ເປັນເວລາຢ່າງໜ້ອຍ 1-2 ວັນ. ພາຍຫຼັງສໍາເລັດການຝຶກອົບຮົມແລ້ວ ພະນັກງານຂອງບໍລິສັດຈະນໍາພານັກສຶກສາທຸກຄົນໄປສົ່ງເຖິງສະຖານທີ່ຮໍ່າຮຽນ.

       ການສະໝັກທຶນຂອງນັກຮຽນນັກສຶກສາ ສາມາດເລືອກສະໝັກໄດ້ຕາມເງື່ອນໄຂຂອງຜູ້ສະໝັກ ແລະ ທຶນທີ່ມີ ເຊິ່ງໃນເວລາສະໝັກ ທັງສອງຝ່າຍ (ຜູ້ໃຫ້ບໍລິການ ແລະ ຜູ້ໃຊ້ບໍລິການ) ຈະຕ້ອງໄດ້ເຮັດໜັງສືສັນຍາລະອຽດ, ເມື່ອໄດ້ທຶນແລ້ວ ບໍລິສັດຈະແຈ້ງໃຫ້ຜູ້ໄດ້ຮັບທຶນຮັບຊາບລາຍລະອຽດຂອງເງື່ອນໄຂຕ່າງໆຂອງທຶນການສຶກສາທີ່ໄດ້ຮັບກ່ອນຈະເດິນທາງໄປຮຽນ ເພື່ອຮັບປະກັນບໍ່ໃຫ້ເກີດມີຫາງສຽງຕາມທີ່ຫຼັງ.