ໃນວັນທີ 25-31.7.2021 ນີ້ ມະຫາວິທະຍາໄລຊົນເຜົ່າກຸ້ຍໂຈ ສປຈີນ ຈະເປັນເຈົ້າພາບຈັດງານສຳມະນາແລກປ່ຽນວັດທະນະທຳຂອງຊາວໜຸ່ມບັນດາປະເທດທີ່ເຂົ້າຮ່ວມເສັ້ນທາງສາຍໄໝ ໂດຍການສະໜັບສະໜູນຂອງລັດຖະບານຈີນ ແລະ ແຂວງກຸ້ຍໂຈ. ອັນເນື່ອງມາຈາກການລະບາດຂອງໂຄວິດ-19 ການເດິນທາງໄປມາລະຫວ່າງປະເທດຍັງຫຍຸ້ງຍາກ ງານດັ່ງກ່າວຈຶ່ງຈະໄດ້ຈັດແບບອອນລາຍ.
ຜູ້ເຂົ້າຮ່ວມງານດັ່ງກ່າວຈະໄດ້ຮັບຟັງຮັບຊົມກ່ຽວກັບ ວັດທະນະທຳຂອງບັນດາຊົນເຜົ່າສ່ວນນ້ອຍໃນແຂວງກຸ້ຍໂຈ ເຊັ່ນ: ວັດທະນະທຳຂອງເຜົ່າມົ້ງ, ເຜົ່າປູ້ຢີ່ (ຄ້າຍຄືກັບເຜົ່າໄທແດງຂອງລາວ), ເຜົ່າຢ້າວ ແລະ ເຜົ່າອື່ນໆ, ການຂຽນໂຕໜັງສືຈີນດ້ວຍລາຍມືພິເສດ, ຈະໄດ້ຮຽນຮູ້ກ່ຽວກັບວັດທະນະທຳໂດຍລວມຂອງຈີນ ໂດຍແຈກຢາຍໜັງສືໃຫ້ອ່ານ, ຮັບຟັງການບັນຍາຍກ່ຽວກັບ ການສອບເສັງວັດລະດັບພາສາຈີນ ຫຼື HSK, ການສອບເສັງວັດລະດັບການເວົ້າພາສາຈີນ ຫຼື HSKK, ເທັກນິກການຂຽນໂຕໜັງສືຈີນ, ຮັບຟັງການເຮັດທຸລະກິດແບບຄົນຈີນ, ຮັບຊົມການວາງສະແດງສິ່ງປະດິດຕ່າງໆ ແລະ ອື່ນໆອີກ.
ເງື່ອນໄຂຜູ້ເຂົ້າຮ່ວມ: ເປັນນັກຮຽນ, ນັກສຶກສາ, ສາມັນຊົນ, ພໍ່ຄ້າຊາວຂາຍ, ທະຫານ, ຕຳຫຼວດ, ພະນັກງານລັດ ຫຼື ເອກະຊົນ ທີ່ມີອາຍຸບໍ່ເກີນ 35 ປີ ແລະ ມີຄວາມສາມາດຮັບຟັງດ້ວຍພາສາຈີນ ຫຼື ພາສາອັງກິດໃນລະດັບດີ.
ເອກະສານທີ່ຈະໄດ້ປະກອບໃນການສະໝັກເຂົ້າຮ່ວມງານດັ່ງກ່າວແມ່ນ: 1) ຕື່ມແບບຟອມສະໝັກ (ຄັດຕິດດ້ານລຸ່ມ) ແລະ 2) ພາສປອດ.
ຂັ້ນຕອນການສະໝັກແມ່ນ: ຫຼັງຈາກຕື່ມແບບຟອມສຳເລັດແລ້ວ ສົ່ງແບບຟອມ ພ້ອມກັບພາສປອດ ໄປຍັງມະຫາວິທະຍາໄລຊົນເຜົ່າກຸ້ຍໂຈ ທາງອີເມລ: gzmugjc@sina.com ຈາກນັ້ນລໍຖ້າການຕອບຮັບຂອງມະຫາວິທະຍາໄລ, ເມື່ອຕອບຮັບແລ້ວ ສາມາດເຂົ້າຮ່ວມງານໄດ້ເລີຍ. ລາຍລະອຽດຂໍ້ແນະນຳ ແລະ ແບບຟອມສະໝັກໄດ້ຄັດຕິດໄວ້ດ້ານລຸ່ມນີ້.
ການເຂົ້າຮ່ວມງານດັ່ງກ່າວ ແມ່ນບໍ່ມີຄ່າໃຊ້ຈ່າຍ ເຂົ້າຮ່ວມຟຣີ.
ແບບຟອມສະໝັກເຂົ້າຮ່ວມງານແລກປ່ຽນວັດທະນະທຳ
